काठमाडौँ । चीनको औपचारिक भ्रमण पुरा गरी प्रधानसेनापति महारथी अशोकराज सिग्देल शनिबार स्वदेश फर्किएका छन् । उनलाई स्वागत गर्न बलाधिकृत रथी प्रदीपजङ्ग केसी त्रिभुवन अन्तर्राष्ट्रिय विमानस्थल पुगेका थिए ।
भ्रमणका क्रममा प्रधानसेनापति सिग्देलले बेइजिङमा आयोजित तेह्रौँ स्याङसान मञ्चमा सहभागिता जनाएका थिए । सोही अवसरमा उनले चिनियाँ रक्षामन्त्रीका साथै त्यहाँका उच्च सैनिक अधिकारीहरूसँग बेग्लै भेटवार्तासमेत गरे । भ्रमणका क्रममा उनले चीनको राष्ट्रिय प्रतिरक्षा विश्वविद्यालय, विभिन्न सैनिक तालिम तथा शिक्षण संस्था र सैनिक एकाइहरूको निरीक्षण तथा अवलोकन गरेका थिए ।
प्रधानसेनापतिको यस भ्रमणले नेपाल र चीनबीच रहिआएको सौहार्दपूर्ण द्विपक्षीय सम्बन्धका साथै दुवै देशका सेनाबीचको सहकार्यलाई थप बलियो र सुमधुर बनाउन मद्दत पुग्ने विश्वास नेपाली सेनाले व्यक्त गरेको छ ।
