दाङ । विशेष सुराकीका आधारमा खटिएको प्रहरी टोलीले दाङका फरक-फरक वन क्षेत्रबाट ११ थान एकनाले भरुवा बन्दुक फेला पारेको छ ।
जिल्ला प्रहरी कार्यालय दाङ तथा मातहतका प्रहरी इकाइहरूले भदौ २५ गते बिहान चार घण्टा चलाएको विशेष खोजतलास अभियानका क्रममा ती हतियारहरू बेवारिसे अवस्थामा बरामद भएका हुन् । प्रहरीका अनुसार घोराही उपमहानगरपालिका–१ शिरुखर्कमा रहेको राष्ट्रिय वनबाट ६ थान बन्दुक भेटिएका थिए । त्यस्तै, बंगलाचुली गाउँपालिका–८ कएना पानीस्थित सामुदायिक वनबाट २ थान र लमही नगरपालिका–७ को नवशान्ती सामुदायिक वन क्षेत्रबाट ३ थान भरुवा बन्दुक नियन्त्रणमा लिइएको छ ।
बरामद गरिएका सम्पूर्ण हतियारहरूलाई थप कारबाहीका लागि जिल्ला प्रहरी कार्यालय दाङमा राखिएको छ । यी बेवारिसे बन्दुकहरू कसका हुन् र कुन प्रयोजनका लागि छुपाइएका थिए भन्ने विषयमा प्रहरीले सूक्ष्म अनुसन्धान अघि बढाएको छ ।
