काठमाडौँ । रसुवास्थित भोटेकोशी नदीमा आएको बाढीका कारण प्रभावित क्षेत्रमा खोजी तथा उद्धार कार्यमा जुटिरहेका सुरक्षाकर्मी र राष्ट्रसेवक कर्मचारीलाई सरकारले जोखिम भत्ता एवं खाजा खर्च उपलब्ध गराउने भएको छ ।
बिहीबार बसेको मन्त्रिपरिषद् बैठकले उद्धार टोलीको मनोबल उच्च राख्न र परिचालनलाई थप प्रभावकारी बनाउन उक्त निर्णय गरेको शिक्षामन्त्री एवं सरकारका प्रवक्ता सस्मित पोखरेलले जानकारी दिए ।
गृह मन्त्रालयबाट पेश भएको उक्त प्रस्तावलाई मन्त्रिपरिषद्ले स्वीकृत गर्दै उद्धार तथा खोजीका क्रममा घाइते हुने सुरक्षाकर्मी तथा कर्मचारीको सम्पूर्ण उपचार खर्च सरकारले व्यहोर्ने व्यवस्था मिलाएको छ ।
यसका साथै विपद् व्यवस्थापनका क्रममा कुनै सुरक्षाकर्मी वा राष्ट्रसेवकको ज्यान गएमा निजको परिवारलाई १० लाख रुपैयाँ राहत रकम प्रदान गर्ने निर्णय समेत गरिएको छ ।
