मकवानपुर । अविरल वर्षाका कारण कुलेखानी जलविद्युत् आयोजनाको जलाशयमा पानीको सतह बढ्दै गएपछि तल्लो तटीय क्षेत्रमा उच्च सुरक्षा सतर्कता अपनाउन अपिल गरिएको छ ।
इन्द्रसरोवर गाउँपालिका तथा नेपाल विद्युत् प्राधिकरण कुलेखानी केन्द्रले सम्भावित जोखिम कम गर्न स्थानीय बासिन्दालाई सजग रहन आग्रह गरेका हुन् ।
जल तथा मौसम विज्ञान विभागले असोज ९ देखि ११ गतेसम्म भारी वर्षाको पूर्वानुमान गरेबमोजिम केही दिनयता यस क्षेत्रमा निरन्तर पानी परिरहेको छ । गाउँपालिकाका अनुसार आज अपराह्न ४ बजेसम्मको तथ्यांक हेर्दा कुलेखानी ड्याममा पानीको सतह १ हजार ५२३ दशमलव ३४ मिटर पुगेको छ । यो सतह सुरक्षाका दृष्टिकोणले अझै सामान्य र नियन्त्रित अवस्थामै रहेको स्पष्ट पारिएको छ । यद्यपि, पूर्वतयारीस्वरूप गाउँपालिकाको वडा नम्बर २ र ३ स्थित खोला किनारमा रहेका घर, टहरा एवम् व्यापारिक संरचनामा बस्नेहरूलाई सुरक्षित स्थानमा सर्न आग्रह गर्दै सूचना जारी गरिएको छ ।
यसैबीच, कुलेखानी ड्याम फुटिसकेको वा खतराको विन्दु नाघिसकेको भन्दै केही अनलाइन माध्यम तथा सामाजिक सञ्जालमा फैलाइएका भ्रमप्रति गाउँपालिकाले गम्भीर ध्यानाकर्षण भएको जनाएको छ । यस्ता भ्रामक खबरले जनमानसमा अनावश्यक त्रास फैलाउने भएकाले त्यस्ता अफवाहको पछि नलाग्न अनुरोध गरिएको छ । गाउँपालिकाले सर्वसाधारणलाई आधिकारिक निकायबाट सम्प्रेषित सूचनालाई मात्र विश्वास गर्न अपिल गरेको छ ।
