सैनिक पोसाक र कडा अनुशासन: बाढीग्रस्त क्षेत्रमा छाएको ‘ग्रीन आर्मी’ आखिर को हुन् ?

काठमाडौँ । बाढी तथा पहिरो प्रभावित क्षेत्रमा सैनिक शैलीको हरियो पोसाक लगाएर उद्धार कार्यमा खटिएका स्वयंसेवकहरूको टोलीले पछिल्लो समय सर्वसाधारणको ध्यान तानेको छ ।

पोसाकमा ‘आर्मी’ लेखिएको र टोली कडा अनुशासनमा खटिएको देखिएपछि धेरैले उनीहरूलाई नेपाली सेना वा सुरक्षा निकायका जवान ठानेका थिए । तर, यो टोली ‘ग्रीन आर्मी नेपाल’ नामक गैरसरकारी स्वयंसेवी संस्था भएको खुलेको छ ।

गोकर्णेश्वर नगरपालिकामा दर्ता भई वातावरण संरक्षण र विपद् व्यवस्थापनको क्षेत्रमा काम गर्दै आएको यस संस्थाका संस्थापक अध्यक्ष सविन शर्मा रहेका छन् । पूर्वप्रहरी महानिरीक्षक सर्वेन्द्र खनाल मुख्य सल्लाहकार रहेको यस संस्थाले विशेषगरी युवाहरूलाई सामाजिक सेवामा जोड्दै विपद्का बेला राज्यका निकायलाई सहयोग गर्दै आएको छ । संस्थाले विद्यालय तहदेखि नै वातावरणीय क्लबमार्फत वृक्षारोपण, सरसफाइ र विपद् सचेतनाका कार्यक्रम समेत सञ्चालन गर्ने गर्दछ ।

सैनिक पोसाकसँग मिल्दोजुल्दो लुगाका विषयमा भ्रम उत्पन्न भएपछि जिल्ला प्रशासन कार्यालय काठमाडौँले २०७८ साउन १२ गतेको गृहमन्त्रालयको सचिवस्तरीय निर्णय, जिल्ला सुरक्षा समिति र जङ्गी अड्डाको रायका आधारमा उक्त पोसाक प्रयोगको अनुमति दिएको पाइएको छ । सेनाको आधिकारिक पोसाकसँग पूर्ण रूपमा मेल नखाने र वातावरण क्षेत्रमा काम गर्ने भएकाले स्वीकृति दिइएको प्रशासनले स्पष्ट पारेको छ ।

हाल भोटेकोशीको महाविपद लगायतका प्रभावित क्षेत्रहरूमा सुरक्षाकर्मीसँगै सरसफाइ, भग्नावशेष हटाउने र राहत वितरणमा संस्थाका स्वयंसेवकहरू सक्रिय छन् । यद्यपि, ‘आर्मी’ शब्द र सैनिक शैलीको पोसाकले सर्वसाधारणमा भ्रम सिर्जना गर्न सक्ने भएकाले संस्थाले आफ्नो भूमिका र परिचयबारे अझ स्पष्ट पार्नुपर्ने आवाज समेत उठेको छ । ग्रीन आर्मीले भने आफ्नो उद्देश्य सैन्य गतिविधि नभई विशुद्ध सामाजिक र स्वयंसेवी सहयोग मात्र रहेको स्पष्ट पारेको छ ।