काठमाडौँ । इरान र अमेरिकाबिच झन्डै सात महिनादेखि जारी तनावबिच इस्लामिक रिभोलुसनरी गार्ड्स कोप्र्स (आईआरजीसी) ले वासिङ्टनलाई थप आक्रमण नगर्न चेतावनी दिएको छ ।
इरानी सेनाको सो प्रभावशाली अङ्गले अमेरिकाले पुनः सैन्य कारबाही अघि बढाएमा नयाँ रणनीति, थप घातक हतियार र अहिलेसम्म आक्रमण नगरिएका नयाँ लक्ष्यहरूमा प्रहार गर्ने स्पष्ट पारेको छ ।
गार्ड्सका प्रवक्ता हुसेन मोहेब्बीका अनुसार अमेरिकी आक्रमणको जवाफमा इरानको प्रतिरक्षा प्रणाली र रणनीतिमा व्यापक फेरबदल ल्याइनेछ । युद्धभूमिमा विश्वलाई नै चकित पार्ने क्षमता भएका नयाँ सैन्य प्रविधि र हतियारहरू उतार्ने तयारी भइरहेको दाबी गर्दै उनले इरान दीर्घकालीन सैन्य मुठभेडका लागिसमेत पूर्ण रूपमा तयार रहेको बताएका छन् ।
दुवै पक्षबिच अहिले नै पूर्ण-स्तरको युद्धमा होमिन अनिच्छा देखिए तापनि क्षेत्रीय स्थिति भने निकै तनावग्रस्त बनेको छ । अघिल्ला साताहरूमा भन्दा लडाइँको गति केही कम भए पनि होर्मुज जलमार्गमा व्यावसायिक जहाजहरूमाथिका आक्रमण र परस्पर नाकाबन्दी कायमै छन् । यता इरान समर्थित हुथी विद्रोहीहरूले साउदी अरबका विभिन्न स्थानलाई लक्ष्य बनाउँदै यमनका नयाँ भूभागहरू आफ्नो कब्जामा लिन थालेपछि यो द्वन्द्व थप जटिल बन्दै गएको छ ।
