काठमाडौँ । संघीय संसद प्रतिनिधिसभाको बैठक आज बिहान ११ बजेका लागि बोलाइएको छ । संसद सचिवालयका अनुसार आजको बैठकमा महत्वपूर्ण विधेयकहरू प्रस्तुत हुनेछन् भने राष्ट्रपतिको कार्यालयबाट प्राप्त पत्र पनि वाचन गरिनेछ ।
बैठकको सुरुमा राष्ट्रपति कार्यालयबाट प्राप्त प्रधानमन्त्रीको कार्यभारसम्बन्धी पत्र पढेर सुनाउने कार्यक्रम रहेको छ । त्यसपछि पूर्वाधार विकास मन्त्री सुनिल लम्सालले ‘फोहोरमैला व्यवस्थापन विधेयक, २०८३’ प्रस्तुत गर्न अनुमति माग्ने प्रस्ताव पेस गर्नेछन् । सो प्रस्ताव स्वीकृत भएसँगै उनले उक्त विधेयक संसदमा प्रस्तुत गर्नेछन् ।
यस्तै, अर्थमन्त्री डा. स्वर्णिम वाग्लेले ‘नागरिक लगानी कोष (तेस्रो संशोधन) विधेयक, २०८३’ र ‘भुक्तानी तथा फस्र्यौट (पहिलो संशोधन) विधेयक, २०८३’ माथि विचार गरियोस् भन्ने प्रस्ताव पेस गर्ने कार्यसूची छ ।
कृषि, वन तथा पर्यावरण मन्त्री गिता चौधरीले राष्ट्रिय सभाबाट उत्पत्ति भएको ‘सङ्क्रामक पशु रोग (नियन्त्रण) विधेयक, २०८३’ माथि विचार गरियोस् भन्ने प्रस्ताव प्रस्तुत गर्नेछन् ।
