काठमाडौँ । उपत्यकामा रात्रिकालीन समयमा यात्रा गर्ने यात्रुको सुविधालाई ध्यानमा राख्दै नौ वटा स्थानीय तहको संयुक्त पहलमा साझा यातायातका ३० वटा बस सञ्चालनमा ल्याइएको छ ।
काठमाडौँ महानगरपालिकाको अगुवाइमा संविधान दिवसको अवसर पारेर ६ वटा प्रमुख रुटमा यो सेवा विस्तार गरिएको हो ।
यसअघि वैशाख १ गतेदेखि सीमित रुटमा परीक्षणका रूपमा सञ्चालन गरिएको सेवालाई सर्वसाधारण, श्रमिक, बिरामी तथा पर्यटकको सहजताका लागि औपचारिक रूपमा फराकिलो बनाइएको छ ।
यस सहकार्यका लागि काठमाडौँ र ललितपुर महानगरपालिकासहित बुढानीलकण्ठ, गोदावरी, चन्द्रागिरी, कीर्तिपुर, भक्तपुर, सूर्यविनायक र मध्यपुर थिमी नगरपालिकाले साझा यातायातसँग सम्झौता पत्रमा हस्ताक्षर गरेका छन् ।
नयाँ व्यवस्था अनुसार जगाती-सूर्यविनायक-ठमेल, लगनखेल-गोदावरी-बुढानीलकण्ठ, चक्रपथ, कीर्तिपुर-जमल, टाखेल-ठमेल र नागढुंगा-विमानस्थल रुटमा नियमित बस चल्नेछन् ।
टिकट बिक्रीबाट उठेको रकमले सञ्चालन खर्च धान्न नसकेमा अपुग रकमको ५० प्रतिशत सम्बन्धित स्थानीय तहले बराबर र बाँकी ५० प्रतिशत जनसङ्ख्याका आधारमा काठमाडौँ र ललितपुर महानगरसहित अन्य नगरपालिकाहरूले व्यहोर्ने सहमति भएको छ ।
