झापा । जिल्लाभर जापानिज इन्सेफलाइटिसको जोखिम तीव्र रूपमा बढेपछि रोकथामका लागि आजदेखि विशेष खोप कार्यक्रम थालिएको छ ।
स्वास्थ्य तथा खाद्य स्वच्छता मन्त्रालयका अनुसार यो अभियानअन्तर्गत ३० वर्ष वा सोभन्दा बढी उमेरका नागरिकका साथै अग्रपङ्क्तिमा खटिने स्वास्थ्यकर्मीहरूलाई खोप प्रदान गरिनेछ ।
हालसम्म झापामा १३ जनामा जापानिज इन्सेफलाइटिसको सङ्क्रमण पुष्टि भइसकेको छ भने ७ जनाले ज्यान गुमाइसकेका छन् । रोगको फैलावट रोक्नका लागि जिल्लाभरका सबै स्थानीय तहमा गरी कुल ४ लाख ८५ हजार नागरिकलाई लक्षित गरेर खोप उपलब्ध गराउने लक्ष्य राखिएको छ ।
मन्त्रालयले तोकिएको उमेर समूहका सम्पूर्ण सर्वसाधारणलाई नजिकैको स्वास्थ्य संस्था वा तोकिएको खोप केन्द्रमा पुगेर खोप लिन अनुरोध गरेको छ ।
यसका साथै, लामखुट्टेको टोकाइबाट बच्नका लागि सुत्दा नियमित झुलको प्रयोग गर्न, शरीर पूर्ण रूपमा ढाक्ने लुगा लगाउन र घरआँगन वरपर पानी जम्न नदिई सरसफाइमा ध्यान दिन पनि आग्रह गरिएको छ ।
