काठमाडौँ । न्युयोर्कमा जारी संयुक्त राष्ट्रसंघको ८१औँ महासभाका क्रममा नेपाल र संयुक्त अरब इमिरेट्स (यूएई) बीच उच्चस्तरीय कूटनीतिक भेटवार्ता सम्पन्न भएको छ ।
युएईको स्थायी नियोगमा आयोजित उक्त बैठकमा परराष्ट्रमन्त्री शिशिर खनाल र यूएईका उपप्रधानमन्त्री एवम् परराष्ट्रमन्त्री शेख अब्दुल्लाह बिन जायद अल नाह्यानबीच दुई देशको आपसी हित र सहकार्यका विषयमा गहन छलफल भयो ।
छलफलका क्रममा परराष्ट्रमन्त्री खनालले नेपालमा हालै आएको जल उत्पन्न विपद् र बाढीबाट प्रभावित जनताका लागि यूएई सरकारले दर्शाएको ऐक्यबद्धता तथा मानवीय सहायताप्रति धन्यवाद ज्ञापन गर्नुभयो । विशेषगरी बाढीपीडितको पुनरुत्थानका लागि यूएईका तर्फबाट प्राप्त थप २ करोड ५० लाख अमेरिकी डलर बराबरको आर्थिक सहयोगप्रति उहाँले कृतज्ञता व्यक्त गर्नुभयो ।
भेटमा दुवै देशका कूटनीतिज्ञहरूबीच नेपाल र यूएईबीचको ऐतिहासिक सम्बन्धलाई अझ उचाइमा पुर्याउने सहमति भएको छ । सो अवसरमा श्रम, व्यापार, पूर्वाधार लगानी, पर्यटन प्रवर्धन, नवीकरणीय ऊर्जा विकास तथा बहुपक्षीय मञ्चहरूमा साझा सहकार्यका आयामबारे सकारात्मक कुराकानी भएको थियो ।
