काठमाडौँ । मुलुकका विभिन्न क्षेत्रमा भएका सवारी दुर्घटनामा परेर पछिल्लो २४ घण्टाको अवधिमा पाँच जनाले ज्यान गुमाएका छन् ।
नेपाल प्रहरीका अनुसार दुर्घटनाका कारण दुई प्रदेशमा दुई-दुई जना र अर्को एक प्रदेशमा एक जनाको निधन भएको हो । जसअनुसार मधेश र लुम्बिनी प्रदेशमा दुई-दुई जनाले ज्यान गुमाएका छन् भने कोशी प्रदेशमा एक जनाको मृत्यु भएको छ ।
त्यसैगरी, देशभरका विभिन्न सडक दुर्घटनामा परेर एक सय एघार जना मानिस घाइते भएका छन् ।
प्रहरीको तथ्याङ्क अनुसार सबैभन्दा बढी कोशी प्रदेशमा ३५ जना र लुम्बिनी प्रदेशमा २४ जना घाइते भएका छन् ।
यस्तै मधेश प्रदेशमा १७ जना, गण्डकी प्रदेशमा १२ जना, सुदूरपश्चिम प्रदेशमा ८ जना, कर्णाली प्रदेशमा ६ जना, काठमाडौँ उपत्यकामा ५ जना र बागमती प्रदेशमा ४ जना घाइते भएको नेपाल प्रहरीले जनाएको छ ।
