काठमाडौँ । साउदी प्रो लिगको नयाँ खेलमा अल नासरले अल दिरियाहमाथि ३–० को प्रभावशाली जित हात पारेको छ ।
रियादस्थित अल अव्वल पार्कमा गएराति सम्पन्न खेलमा टोलीका लागि क्रिस्टियानो रोनाल्डो, सामु कोस्टा र किङ्स्ले कोमानले १–१ गोल गर्दै टोलीलाई सहज जित दिलाए ।
खेल सुरु भएको २३औँ मिनेटमा किङ्स्ले कोमानको कडा प्रहारलाई विपक्षी गोलरक्षक वालिद अब्दुल्लाहले पूर्ण रूपमा बचाउन नसकेपछि प्राप्त बललाई रोनाल्डोले सहजै गोलमा परिणत गरे । राष्ट्रिय टिमको विवादपछि क्लब फुटबलमा फर्किएका रोनाल्डोको करियरको यो ९८०औँ गोल हो ।
त्यसपछि खेलको ३५औँ मिनेटमा जोआओ फेलिक्सले प्रहार गरेको कर्नरलाई सदुपयोग गर्दै सामु कोस्टाले उत्कृष्ट हेडरमार्फत टोलीको अग्रता दोब्बर बनाए । पहिलो हाफमा २–० ले अगाडि रहेको अल नासरले दोस्रो हाफमा पनि दबाब कायम राख्यो । खेलको ७७औँ मिनेटमा साडियो मानेको पासमा कोमानले व्यक्तिगत पहिलो तथा टोलीका लागि तेस्रो गोल गर्दै ३–० को जित सुनिश्चित गरे ।
यस जितसँगै ८ खेलबाट १९ अङ्क जोडेको अल नासर लिग तालिकाको दोस्रो स्थानमा उक्लिएको छ । समान अङ्क भए पनि गोल अन्तरका आधारमा अल कादसिया शीर्ष स्थानमा यथावत छ ।
