काठमाडौँ । नेपाल स्टक एक्सचेन्ज (नेप्से) परिसूचकमा मंगलबार झिनो गिरावट दर्ता भएको छ । कारोबार समयभर उतारचढावपूर्ण स्थितिमा रहेको सेयर बजार अन्त्यमा ०.९४ अंकले घटेर २६३०.७६ विन्दुमा ओर्लिएर बन्द भएको छ ।
आजको कारोबारमा विभिन्न ३६० वटा कम्पनीका १ करोड ५३ लाख ४६ हजार २२६ कित्ता सेयर खरिदबिक्री भएका छन् । कुल ५ अर्ब ७९ करोड ९३ लाख ३० हजार २०३ रुपैयाँ बराबरको वित्तीय कारोबार भएको छ ।
समूहगत सूचकको अवस्था हेर्दा जलविद्युत (हाइड्रो), लघुवित्त (माइक्रोफाइनान्स), म्युचुअल फन्ड र अन्य समूहबाहेक बाँकी सम्पूर्ण क्षेत्रका सेयर मूल्यमा मन्दी देखिएको छ ।
बजारमा बेनी हाइड्रोको सेयर मूल्यमा उत्साहजनक वृद्धि भई १४.९८ प्रतिशतले बढेको छ भने माथिल्लो मैलुन खोला जलविद्युतको सेयर मूल्य १२.०९ प्रतिशतले उकालो लागेको छ । अर्कोतर्फ युनिलिभर नेपालको सेयर मूल्यमा भने सबैभन्दा बढी ४.९१ प्रतिशतको गिरावट आएको छ ।
कारोबार रकमका आधारमा आज घलेम्दी हाइड्रो अग्रस्थानमा रहन सफल भयो, जसको २८ करोड ५८ लाख रुपैयाँ बराबरको सेयर किनबेच भएको छ । त्यसैगरी पिपुल्स हाइड्रोको २४ करोड ६९ लाख रुपैयाँको सेयर कारोबार भएको छ ।
