काठमाडौँ । जल तथा मौसम विज्ञान विभागअन्तर्गतको मौसम पूर्वानुमान महाशाखाले हाल देशमा पश्चिमी न्यून चापीय प्रणालीका साथै मनसुनी वायुको प्रभाव कायम रहेको जानकारी दिएको छ ।
महाशाखाका अनुसार हाल देशको हिमाली भू-भागमा साधारणतया बदली तथा बाँकी भू-भागमा आंशिक बादली लागेको छ। आज दिउँसो देशका हिमाली र पहाडी भू-भागमा आंशिक बादली हुने तथा तराई क्षेत्रको मौसम मुख्यतया सफा रहनेछ । यद्यपि, कोशी, बागमती र कर्णाली प्रदेशका हिमाली तथा पहाडी भू-भागका थोरै स्थानहरूमा साथै गण्डकी, लुम्बिनी र सुदूरपश्चिम प्रदेशका पहाडी भू-भागका एक-दुई स्थानमा मेघगर्जन र चट्याङसहित मध्यम वर्षाको सम्भावना रहेको छ ।
त्यस्तै, आज राति पनि हिमाली र पहाडी भू-भागमा आंशिक बादली रही तराई क्षेत्रको मौसम मुख्यतया सफा रहनेछ भने तराईका केही भू-भागमा बिहानपख हुस्सु लाग्ने अनुमान गरिएको छ ।
यसैगरी, कोशी, बागमती र कर्णाली प्रदेशका हिमाली भू-भागका एक-दुई स्थानमा मेघगर्जन र चट्याङसहित हल्का वर्षा वा हिमपात हुन सक्ने महाशाखाले जनाएको छ ।
