काठमाडौँ । नेपाली कांग्रेसको १५औँ महाधिवेशन अन्तर्गत खुला सहमहामन्त्री पदको मतगणनामा नेताद्वय रामहरि खतिवडा र अजयबाबु शिवाकोटीले जित हासिल गरेका छन् ।
केन्द्रीय निर्वाचन समितिले अन्तिम मतपरिणामको औपचारिक घोषणा गर्न बाँकी रहे तापनि प्राप्त गणना अनुसार उनीहरू अग्रस्थानमा रहँदै विजयी बनेका हुन् ।
सहमहामन्त्री पदका विजेता खतिवडाले कुल २ हजार ९१९ मत प्राप्त गरेका छन् भने अर्का विजयी उम्मेदवार शिवाकोटीले २ हजार ७२ मत ल्याएका छन् । खुलातर्फको दुई सहमहामन्त्री पदका लागि कुल नौ जना नेताहरू मैदानमा उत्रिएका थिए ।
प्रतिस्पर्धामा गण्डकी प्रदेशसभा सदस्य डिल्लीराम सुवेदी १ हजार ८५१ मत प्राप्त गर्दै तेस्रो स्थानमा रहे । यस्तै पूर्वगृहराज्यमन्त्री देवेन्द्रराज कण्डेलले १ हजार ३८२ मत ल्याएका छन् भने राजिव ढुंगानाले १ हजार २४१ मत प्राप्त गरे । त्यसैगरी विकास कोइरालाले १ हजार १४९ मत, अमृतकुमार अर्यालले १ हजार ३९ मत, रमेश धमलाले ८२१ मत र विमल क्षेत्रीले २८२ मत ल्याएका छन् ।
