काठमाडौँ । मनसुनी र पश्चिमी वायुको आंशिक प्रभावका कारण मुलुकका विभिन्न क्षेत्रको मौसममा फेरबदल आएको जल तथा मौसम विज्ञान विभागअन्तर्गतको मौसम पूर्वानुमान महाशाखाले जनाएको छ ।
अहिले देशका हिमाली तथा पहाडी भेगमा आंशिक बदली हुनुका साथै तराईका केही ठाउँमा हुस्सु लागेको छ । महाशाखाका अनुसार आज दिउँसो कोशी, बागमती, गण्डकी र लुम्बिनी प्रदेशका हिमाली तथा पहाडी भूभागमा साधारणतया बादल लाग्नेछ भने कर्णाली, सुदूरपश्चिम र समग्र तराई क्षेत्रमा आंशिक बदली रहनेछ । यस क्रममा कोशी, बागमती, गण्डकी र लुम्बिनीका हिमाली र पहाडी भेगका थोरै स्थानमा तथा कर्णाली र सुदूरपश्चिमका हिमाली/पहाडी भागका एक-दुई स्थानमा मध्यम वर्षा वा हिमपातको सम्भावना छ । लुम्बिनी प्रदेशका तराई क्षेत्रमा पनि छिटपुटदेखि हल्का वर्षा हुनसक्ने अनुमान छ ।
त्यस्तै, आज राति कोशी, मधेश, बागमती, गण्डकी, लुम्बिनी, कर्णाली र सुदूरपश्चिम प्रदेशका पहाडी तथा तराई भूभागमा साधारणतया बदली भई बाँकी भेगमा आंशिक बादल लाग्नेछ । भोलि बिहान तराईका क्षेत्रमा हुस्सु लाग्ने सम्भावना छ ।
रातिको समयमा कोशी, बागमती, गण्डकी र लुम्बिनीका पहाडी तथा तराई क्षेत्रका थोरै स्थानमा मध्यम वर्षाको आकलन गरिएको छ । कोशी र बागमतीका हिमाली भूभागका साथै कर्णाली र सुदूरपश्चिमका पहाडी भेगमा हल्का वर्षा वा हिमपात तथा मधेश र सुदूरपश्चिमका तराईका केही स्थानमा हल्का वर्षाको सम्भावना रहेको महाशाखाले जनाएको छ ।
