काठमाडौँ । दुबईबाट इजरायलको तेल अभिभतर्फ उडान भरिरहेको फ्लाईदुबईको विमान अपहरण प्रयास घटनाको अनुसन्धान तीव्र पारिएका बेला यूएई प्रहरीले माल्दिभ्सका दुई जना सहचालकलाई नियन्त्रणमा लिएको छ । माल्दिभियन सञ्चारमाध्यम अधाधूका अनुसार अक्टोबर ३ मा उनीहरूलाई पक्राउ गरिएको हो ।
यसअघि सेप्टेम्बर ३० मा ओमानका सहचालक हम्माम अल–हम्मामीले उडानकै क्रममा भारतीय मुख्य चालक स्मित मच्छारमाथि धारिलो हतियार प्रहार गरी विमान आफ्नो नियन्त्रणमा लिने कोसिस गरेका थिए । १७४ जना सवार उक्त विमानमा घाइते चालक मच्छारको प्रतिकार पछि अन्य चालक दलका सदस्य तथा यात्रुहरू मिलेर आक्रमणकारीलाई नियन्त्रणमा लिएका थिए । त्यसलगत्तै विमानलाई साउदी अरबको तबुक विमानस्थलमा सुरक्षित रूपमा आपत्कालीन अवतरण गराइएको थियो ।
संयुक्त अरब इमिरेट्स (यूएई) का सुरक्षा अधिकारीहरूले यसलाई सम्भावित आतङ्कवादी षड्यन्त्रका रूपमा लिएर अनुसन्धान अघि बढाएका छन् । यद्यपि पक्राउ परेका दुई माल्दिभियन सहचालकहरूको भूमिकाबारे विस्तृत विवरण सार्वजनिक भइसकेको छैन । यस घटनाको गम्भीरतालाई ध्यानमा राख्दै भारतको राष्ट्रिय अनुसन्धान निकाय (एनआईए) ले पनि छुट्टै मुद्दा दर्ता गरी छानबिन सुरु गरेको छ । आक्रमणमा चोटपटक लागेका भारतीय पाइलट मच्छारको अबुधाबीस्थित अस्पतालमा उपचार भइरहेको र स्वास्थ्य स्थितिमा सुधार आइरहेको भारतीय विदेश मन्त्रालयले जनाएको छ ।
