काठमाडौँ । प्रसिद्ध आनी तथा गायिका आनी छोइङ डोल्मालाई सरकारले लुम्बिनी विकास कोषको उपाध्यक्षको जिम्मेवारी सुम्पिएको छ ।
शुक्रबार बसेको मन्त्रिपरिषद् बैठकले उनलाई उक्त पदमा चयन गर्ने निर्णय गरेको संस्कृति, पर्यटन तथा नागरिक उड्डयन मन्त्रालयले जनाएको छ ।
लुम्बिनी विकास कोष ऐन, २०४२ को दफा ८ को उपदफा (१) को खण्ड (ख) मा व्यवस्था भएबमोजिम उनलाई नियुक्त गरिएको हो। यस ऐनअनुसार उनको कार्यकाल ५ वर्षको रहनेछ ।
लामो समयदेखि खाली रहेको कोषको उपाध्यक्ष पदमा नियुक्त भएकी आनी छोइङ डोल्मा १३ वर्षको उमेरमा शिवपुरीस्थित नागी गुम्बा प्रवेश गरेकी हुन् । बौद्ध मन्त्र तथा धार्मिक संगीतको अध्ययन गरेकी उनले आधुनिक संगीतको माध्यमबाट बौद्ध भजन तथा मन्त्रलाई विश्वभर चिनाउन महत्त्वपूर्ण योगदान पुर्याएकी छन् ।
