काठमाडौँ । १५ औं महाधिवेशन समापनसँगै नेपाली कांग्रेस थप सुदृढ र नयाँ जोसका साथ राजनीतिक मैदानमा प्रस्तुत हुने पार्टीका उपसभापति विश्वप्रकाश शर्माले दाबी गरेका छन् ।
राजधानीमा आयोजित महाधिवेशनको भव्य उद्घाटन सत्रमा बोल्दै शर्माले संस्थापक नेता बी.पी. कोइरालाको वैचारिक विरासतलाई जोगाउँदै नयाँ पुस्ताले पार्टीको नेतृत्व कुशल रूपमा सम्हालिरहेको उल्लेख गरे । अग्रज नेताहरूको योगदानलाई सम्मान गर्दै देशको समग्र विकास र समृद्धिका लागि कांग्रेसले निर्णायक भूमिका खेल्ने उनको भनाइ थियो ।
संविधान संशोधनको प्रसङ्ग उठाउँदै उपसभापति शर्माले यो केवल संसद्को अङ्कगणितमा सीमित हुने विषय नभएको प्रस्ट पारे । संविधानप्रति सबै वर्ग र समुदायको अपनत्व कायम गर्न विगतमा संविधान सभामा रहेका तर हाल संसद्बाहिर रहेका राजनीतिक दलहरूलाई पनि छलफल र प्रक्रियामा समेट्न उनले सरकारको ध्यानाकर्षण गराए ।
यसका साथै देशको प्रगति र जनहितका मुद्दामा कांग्रेसले सरकारलाई पूर्ण सहयोग र सहकार्य गर्ने प्रतिबद्धतासमेत उनले व्यक्त गरे ।
