चितवन । लगातारको ठूलो वर्षाका कारण मुग्लिन-नारायणगढ सडकखण्ड पूर्ण रूपमा बन्द भएको छ ।
यस खण्डको तुईन खोलामा ठूला ढुंगा खसेका छन् भने सेती दोभान क्षेत्रमा माथिबाट लेदो माटो बगेर आएपछि गाडी चल्न नसकेका हुन् ।
सडकमा थुप्रिएको पहिरो हटाउनका लागि आवश्यक मेसिन तथा उपकरणहरू तयारी अवस्थामा राखिएका छन् । तर, पानी पर्ने क्रम नरोकिएकाले पहिरो पन्छाएर बाटो खुलाउन समस्या भइरहेको सडक डिभिजन कार्यालय भरतपुरले जनाएको छ ।
बाटो ठप्प भएपछि धेरै यात्रुवाहक बस तथा मालवाहक ट्रकहरू बीच बाटोमै अलपत्र परेका छन् । जोखिम बढ्न सक्ने भएकाले सडक डिभिजनले ती सवारीसाधनलाई सुरक्षित ठाउँमा राख्न र चालक तथा यात्रुलाई विशेष सावधानी अपनाउन भनेको छ । साथै, पानी परिरहेकाले सडकको अवस्था बुझेर मात्र निस्कन र जरुरी काम नभई यस सडकखण्डमा यात्रा नगर्न कार्यालयले आग्रह गरेको छ ।
