काठमाडौँ । संघीय संसद्का सदस्यहरूले चालू आर्थिक वर्षको आफ्नो र परिवारको सम्पत्ति विवरण अनिवार्य रूपमा बुझाउनुपर्ने भएको छ ।
संसद् सचिवालयले सूचना जारी गर्दै आर्थिक वर्ष २०८२/८३ को सम्पत्ति विवरण आगामी भदौ २९ गतेभित्र दर्ता गराउन सांसदहरूलाई आग्रह गरेको हो ।
भ्रष्टाचार निवारण ऐन, २०५९ र अख्तियार दुरुपयोग अनुसन्धान आयोग ऐन, २०४८ को कानुनी व्यवस्थाअनुसार आर्थिक वर्ष सकिएको ६० दिनभित्र यो विवरण बुझाउनुपर्छ । जसअनुसार सांसदहरूले २०८३ साउन १ गतेदेखि भदौ २९ गतेसम्मको अवधिमा सम्पत्तिको स्रोतसहितको अद्यावधिक विवरण पेस गर्नुपर्ने संसद् सचिवालयले जनाएको छ ।
सचिवालयका अनुसार सांसदहरूले आफ्नो विवरण सिलबन्दी खाममा राखेर संसद् सुविधा व्यवस्थापन शाखा (भवन नं. १, कोठा नं. २०७) मा बुझाउनुपर्नेछ । यसका लागि आवश्यक फाराम सोही शाखा वा संसद्को आधिकारिक वेबसाइटबाट डाउनलोड गर्न सकिने व्यवस्था मिलाइएको छ ।
विवरण बुझाउने खामको बाहिर नाम, लिङ्ग, पद, कार्यालयका साथै प्रतिनिधिसभा सदस्यको हकमा जिल्ला तथा निर्वाचन क्षेत्र र राष्ट्रियसभा सदस्यको हकमा निर्वाचित प्रदेश खुलाउनुपर्नेछ । यसैगरी स्थायी ठेगाना, मोबाइल नम्बर र इमेल पनि स्पष्ट रूपमा उल्लेख गर्नुपर्ने सचिवालयले जनाएको छ ।
