काठमाडौँ । राष्ट्रिय स्वतन्त्र पार्टी (रास्वपा) ले आफ्नो संसदीय दलको विधान संशोधन गर्न नयाँ कार्यदल बनाएको छ ।
सिंहदरबारमा बुधबार आयोजना गरिएको रास्वपा संसदीय दलको बैठकले समयसापेक्ष रूपमा विधान परिमार्जन गर्न प्रमुख सचेतकको नेतृत्वमा सो कार्यदल गठन गर्ने निर्णय गरेको उपनेता गणेश पराजुलीले जानकारी दिए । उक्त कार्यदललाई आगामी ७ दिनभित्र आवश्यक प्रतिवेदन र कार्यविधि तयार पारी बुझाउने गरी समयसीमा तोकिएको छ ।
यस्तै बैठकमा सरकारमा सहभागी मन्त्रीहरूले आफ्नो मन्त्रालयले हालसम्म गरेका काम तथा प्रगतिको विवरण पेस गरेका थिए ।
सांसदहरूले भने आ-आफ्नो क्षेत्रका जनगुनासो, क्षेत्रीय समस्या र सरकारका कमीकमजोरीका विषयमा ध्यानाकर्षण गराएका थिए ।
त्यस क्रममा बजारमा चुलिँदै गएको एलपी ग्यासको अभाव र सर्वसाधारणले बस्नुपरेको लामो लाइनबारे सांसदहरूले प्रश्न उठाएका थिए ।
