काठमाडौँ । आर्थिक अभावका कारण कुनै पनि जलनका बिरामी उपचारबाट वञ्चित हुन नपरोस् भन्ने उद्देश्यले काठमाडौँ महानगरपालिकाले कीर्तिपुर अस्पतालसँग नयाँ सम्झौता गर्दै २ लाख रुपैयाँसम्मको निःशुल्क उपचार सेवा सुरु गरेको छ ।
महानगरपालिकाले विपन्न, हिंसापीडित तथा बेवारिसे नागरिकका साथै स्थानीय बासिन्दा, जनप्रतिनिधि र कर्मचारी परिवारलाई लक्षित गरी यो सुविधा ल्याएको हो । यसका लागि महानगरले अस्पताललाई २ करोड रुपैयाँ हस्तान्तरण गरेको छ, जसमध्ये १ करोड रुपैयाँ सिधै जलन उपचार कोषमा रहनेछ ।
उक्त कोषको रकम साधारण उपचारमा मात्र खर्च हुनेछ भने क्याबिन वा सौन्दर्य उपचारमा प्रयोग गर्न पाइने छैन ।
महानगरकी कार्यवाहक प्रमुख सुनिता डंगोलका अनुसार उपचारसँगै अग्नि नियन्त्रक, नगर प्रहरी र सर्वसाधारणलाई जलनबाट बच्ने उपाय तथा प्राथमिक उपचारसम्बन्धी तालिम एवं जनचेतनामूलक कार्यक्रमसमेत सञ्चालन गरिनेछ ।
