काठमाडौँ । बालबालिकाको सुरक्षा र संरक्षणलाई प्राथमिकता दिँदै सरकारले विपद् वा अन्य जोखिममा परेका बालबालिकाका लागि ‘स्याहार योजना’ सुरु गरेको छ ।
यसै कार्यक्रमअन्तर्गत ललितपुरको गोदावरी नगरपालिका–१२ ठेचोमा एक अस्थायी संरक्षण सेवा केन्द्र सञ्चालनमा ल्याइएको छ ।
महिला, बालबालिका, लैङ्गिक तथा यौनिक अल्पसङ्ख्यक र सामाजिक सुरक्षा मन्त्रालयको समन्वयमा राष्ट्रिय बाल अधिकार परिषद्ले उक्त केन्द्र व्यवस्थापन गरेको हो । विपद्का कारण आफन्तबाट बिछोडिएका, अभिभावक नभएका तथा तत्काल विशेष संरक्षण चाहिने बालबालिकालाई यस केन्द्रले सुरक्षित बासस्थान र आवश्यक सहारा प्रदान गर्नेछ ।
केन्द्रमा बालबालिकाका लागि खानपान, बास, स्वास्थ्य परीक्षण, मनोसामाजिक परामर्श र परिवार खोजीजस्ता सेवा एकीकृत रूपमा उपलब्ध गराइनेछ ।
बालबालिकाको हितलाई ध्यानमा राख्दै उनीहरूलाई प्राथमिकताका साथ आफ्नै परिवार वा आफन्तको जिम्मा लगाउने प्रयास गरिनेछ । यदि परिवार भेटिने सम्भावना नरहेमा मात्र कानुन बमोजिम दीर्घकालीन संरक्षणको विकल्प रोजिनेछ ।
