काठमाडौँ । मनसुन नेपालबाट पूर्ण रूपमा बाहिरिएसँगै यसपालिको दशैँमा ठूलो झरी पर्ने कुनै सम्भावना नरहेको मौसम पूर्वानुमान महाशाखाले जनाएको छ ।
हाल देशमा पश्चिमी वायुको आंशिक प्रभाव मात्र सक्रिय रहेकाले दशैँभरि देशभरकै मौसम सामान्यतया अनुकूल नै रहने देखिन्छ ।
महाशाखाले सार्वजनिक गरेको दशैँ विशेष मौसम बुलेटिन अनुसार तराईका धेरैजसो भूभागमा घाम लाग्ने र मौसम सफा रहनेछ ।
यद्यपि, हिमाली तथा पहाडी भेगमा भने आंशिक बदलीसँगै केही ठाउँमा हल्का वर्षा वा हिमपातको सम्भावना छ । विशेषगरी विजयादशमीसम्म कोशी, बागमती र गण्डकी प्रदेशका पहाडी तथा हिमाली भेग र कर्णाली अनि सुदूरपश्चिम प्रदेशका हिमाली क्षेत्रमा हल्का बादल लाग्नेछ । यी क्षेत्रका एक-दुई ठाउँमा हल्का वर्षा र उच्च हिमाली भेगमा हिमपात हुनसक्ने भएकाले चाडबाडका बेला यात्रा गर्नेहरूलाई चट्याङ र मौसमको सामान्य बदलावप्रति सतर्क रहन महाशाखाले आग्रह गरेको छ ।
