काठमाडौँ । उपत्यकामा ट्राफिक नियम मिच्ने चालकहरूमाथि प्रहरीले निगरानी बढाएसँगै ठूलो संख्यामा कारबाही परेका छन् ।
काठमाडौँ उपत्यका ट्राफिक प्रहरी कार्यालयका अनुसार पछिल्लो २४ घण्टाको अवधिमा मात्रै १ हजार ९९४ जना सवारीचालकलाई विभिन्न नियम उल्लङ्घन गरेको कसुरमा कारबाही गरिएको हो । यसरी गरिएको कारबाहीबाट राज्यकोषमा कुल ५ लाख ४१ हजार ५०२ रुपैयाँ राजस्व संकलन भएको प्रहरीले जनाएको छ ।
कारबाहीमा पर्नेहरूमध्ये सबैभन्दा धेरै अन्य विविध ट्राफिक नियम पालना नगर्ने ९६२ जना रहेका छन् । यसैगरी लेन अनुशासन पालना नगर्ने १५८ जना, ट्राफिक संकेत बत्ती (ट्राफिक लाइट) उल्लङ्घन गर्ने १४९ जना र नियमविपरीत ‘राइड सेयरिङ’ गर्ने १४२ जना चालक पनि कारबाहीको दायरामा आएका छन् । निषेधित क्षेत्रमा हर्न बजाउने १३० जना, सडक पेटी (फुटपाथ) मा सवारीसाधन ‘पार्किङ’ गर्ने १२८ जना र मादकपदार्थ सेवन (मापसे) गरेर सवारी चलाउने १२७ जनालाई प्रहरीले नियन्त्रणमा लिई कारबाही गरेको हो । तीव्र गतिमा सवारीसाधन हुइँक्याउने १०३ जना र एकतर्फी (वान वे) सडकमा सवारी चलाउने ९५ जना चालकमाथि पनि ट्राफिक प्रहरीले कारबाही प्रक्रिया अगाडि बढाएको छ ।
