काठमाडौँ । पश्चिम तराईका क्षेत्रमा केही दिनयता ह्वात्तै बढेको तापक्रम र चर्को घामका कारण स्थानीय बासिन्दाको दैनिक तालिका प्रभावित भएको छ ।
मध्याह्नतिर चल्ने तातो हावा र उकुसमुकुस गराउने गर्मीले गर्दा सर्वसाधारणहरू अत्यावश्यक कामबाहेक घरबाहिर निस्कन छाडेका छन् , जसका कारण दिउँसोको समयमा बजार र सडकहरूमा चहलपहल निकै कम देखिन थालेको छ । यस्तो मौसममा शरीरलाई शितल राख्नका लागि बजारमा गुड र उखुको जुसका साथै लस्सी पसलहरूमा सर्वसाधारणको भिडभाड निकै बाक्लो हुन थालेको छ ।
जल तथा मौसम विज्ञान विभाग कोहलपुर कार्यालयका प्रमुख रामप्रसाद अवस्थीका अनुसार पश्चिम तराईका अधिकांश भूभागमा यतिबेला अधिकतम तापक्रम ४० डिग्री सेल्सियस वा त्यसको आसपास रेकर्ड गरिएको छ । दिनानुदिन पारो बढ्दै जाँदा यसको सीधा असर विद्यालय जाने साना बालबालिका र दिनभरि खुला आकाशमुनि श्रम गर्ने दैनिक ज्यालादारी मजदुरहरूलाई परिरहेको उहाँले जानकारी दिनुभयो ।
यता प्रचण्ड गर्मीसँगै विद्युत् सेवा नियमित नहुँदा स्थानीयले थप सास्ती भोग्नुपरेको नेपालगञ्जका शिवदत्त भट्टले गुनासो गर्नुभयो । गर्मी भुल्नका लागि पङ्खा , कुलर र एयर कन्डिसनर जस्ता उपकरणहरू एकैपटक धेरै प्रयोग हुँदा प्रणालीमा लोड बढेर प्रसारण लाइनमा प्राविधिक समस्या आइरहेको नेपाल विद्युत प्राधिकरणले जनाएको छ ।
