उदयपुर । सिद्धिचरण लोकमार्ग अन्तर्गत कटारी नगरपालिका १ पानीट्याङ्कीमा एक टिपर दुर्घटना हुँदा सात जना यात्रु घाइते भएका छन् ।
खोक्सा क्षेत्रबाट मिर्चैयातर्फ गुडिरहेको ना १ क ५५4९ नम्बरको टिपर मोड घुम्ने क्रममा अनियन्त्रित भई सडकको छेउमा पल्टिएको हो ।
प्रहरीका अनुसार दुर्घटनामा परेर कटारी नगरपालिका २ गुराँसे निवासी ६० वर्षीय शेरबहादुर थापा, ५० वर्षीया सुनिता थापा, २३ वर्षीया जेनी श्रेष्ठ, ४८ वर्षीया सिता श्रेष्ठ, ३९ वर्षीया यशोदा खड्का, ४० वर्षीया कृजा थापा र ४० वर्षीय कुलबहादुर अधिकारी घाइते भएका छन् ।
घाइतेमध्ये शेरबहादुर र सुनिताको मिर्चैयामा रहेको मनकामना अस्पतालमा उपचार भइरहेको छ । बाँकी पाँच जना घाइतेको भने मिर्चैयाकै विष्णु क्लिनिकमा उपचार भइरहेको र उनीहरूको अवस्था सामान्य रहेको छ । दुर्घटनापश्चात् कटारी नगरपालिका २ ददरिया बस्ने २३ वर्षीय टिपर चालक राजेश दनुवार फरार भएकाले उनको खोजी कार्य तीव्र पारिएको प्रहरीले जनाएको छ ।
