काठमाडौँ । दक्षिण अमेरिकी देश भेनेजुएलामा हालै आएका दुईवटा विनाशकारी भूकम्पका कारण ज्यान गुमाउनेको संख्या ९२० पुगेको छ ।
अन्तर्राष्ट्रिय सञ्चारमाध्यमहरूका अनुसार यस प्राकृतिक विपत्तिमा परी ज्यान गुमाउनेहरूमध्ये कम्तीमा ४० जना विदेशी नागरिक रहेका छन् । पोर्चुगलका समुदाय मामिलासम्बन्धी राज्यमन्त्री एमिडियो साउसाले आफ्ना २८ जना नागरिकको भूकम्पमा मृत्यु भएको पुष्टि गरेका छन् ।
यसैगरी, भेनेजुएलास्थित चिनियाँ दूतावासलाई उद्धृत गर्दै त्यहाँका सञ्चारमाध्यमले सात जना चिनियाँ नागरिकको ज्यान गएको उल्लेख गरेका छन् । स्पेनका विदेशमन्त्री होसे म्यानुएल अल्बारेसका अनुसार पाँच जना स्पेनी नागरिकको मृत्यु भएको छ भने ११९ जना अझैसम्म हराइरहेका छन् । ब्राजिल सरकारले आफ्ना दुई नागरिक र इटालीको विदेश मन्त्रालयले एक इटालियन–भेनेजुएली नागरिकको मृत्यु भएको जनाएका छन् ।
विपत्तिका बीच संयुक्त राष्ट्रसंघका मानवीय सहायता प्रमुख टम फ्लेचरले अन्तर्राष्ट्रियस्तरबाट भइरहेको उद्धार तथा राहत कार्य निकै प्रभावकारी ढंगले अगाडि बढेको बताएका छन् । उनका अनुसार रुस, युक्रेन, अमेरिका, युरोप र मध्यपूर्वका विभिन्न मुलुकबाट उद्धार टोलीहरू घटनास्थलमा खटिएका छन् । संकटको यस घडीमा राजनीतिक मतभिन्नतालाई बिर्सेर मानवीय सहयोगलाई प्राथमिकता दिइएको उनले प्रस्ट पारेका छन् ।
हाल राष्ट्रसंघले ३९ वटा उद्धार टोली र करिब दुई हजार अन्तर्राष्ट्रिय उद्धारकर्मीहरूलाई भेनेजुएलामा परिचालन गरेको छ । यस अभियानमा भग्नावशेषभित्र खोजी गर्न विशेष तालिमप्राप्त १११ वटा कुकुरहरू समेत प्रयोग गरिएको छ, जसले कठिन स्थानमा गन्ध पहिचान गरी मानिसहरूको पहिचान गर्न महत्त्वपूर्ण सहयोग पुर्याइरहेका छन् । यद्यपि, विगत १८ महिनामा संयुक्त राष्ट्रसंघको मानवीय सहायता बजेट झन्डै आधाले कटौती भएका कारण राहत सामग्री र आवश्यक स्रोत जुटाउन भने निकै चुनौती थपिएको फ्लेचरले बताएका छन् ।
