काठमाडौँ । नदीकिनारका सुकुम्बासी बस्तीबाट विस्थापित भई हाल होल्डिङ सेन्टरमा बस्दै आएका नागरिकहरूले सरकारले वैकल्पिक व्यवस्था नगरेको भन्दै आन्दोलन सुरु गरेका छन् ।
उचित पुनःस्थापनाको ग्यारेन्टी बिना नै सेन्टर खाली गर्न ताकेता गरिएको भन्दै सुकुम्बासीहरूले शुक्रवार काठमाडौँको माइतीघर मण्डलामा भेला भएर विरोध प्रदर्शन गरेका हुन् ।
सुकुम्बासी केन्द्रीय संयुक्त संघर्ष समितिको अगुवाइमा भएको उक्त प्रदर्शनमा सहभागीहरूले आफूहरूको उठिबास लगाउन लागिएको भन्दै आक्रोश व्यक्त गरे । गत वैशाख महिनामा काठमाडौँ उपत्यकाभित्रका नदीकिनारमा रहेका सुकुम्बासी बस्तीहरू हटाइएका थिए । त्यसबेला विस्थापित भएका परिवारहरूलाई अस्थायी रूपमा होल्डिङ सेन्टरमा राखिएको थियो ।
यसैबीच, अधिकार सम्पन्न बागमती सभ्यता एकीकृत विकास समितिले शुक्रवार नै एक सूचना जारी गर्दै सुकुम्बासीहरूलाई होल्डिङ सेन्टर छाड्नका लागि आगामी असार १९ गतेसम्मको अन्तिम समयसीमा थप गरेको छ । तर, आन्दोलनकारीहरूले भने सरकारले स्थायी वा सुरक्षित विकल्प नदिएसम्म उक्त स्थानबाट नसर्ने अडान लिएका छन् ।
