काठमाडौँ । चिकित्सा शिक्षा आयोगको ६ वर्ष पुरानो निर्णय उल्टिएसँगै अब मुलुकका ठूला मेडिकल कलेजहरूले पीसीएल नर्सिङ (स्टाफ नर्स) को पठनपाठन पुनः सुरु गर्न पाउने भएका छन् ।
चिकित्सा शिक्षा ऐनविपरीत भन्दै आयोगले लगाएको रोकलाई अदालतको आदेशपछि फुकाइएसँगै यो बाटो खुलेको हो ।
यसअघि आयोगले २०७७ साउन ३० गते एउटा शिक्षण संस्थाले नर्सिङ विधाका माथिल्ला तह (बीएन, बीएस्सी वा एमएन) मध्ये कुनै एक मात्र कार्यक्रम चलाउन पाउने नीतिगत निर्णय गरेको थियो । सोही निर्णयका कारण देशभरका अधिकांश ठूला मेडिकल कलेजमा पीसीएल नर्सिङको भर्ना प्रक्रिया ठप्प बनेको थियो ।
आयोगको उक्त कदम प्रचलित कानुनविपरीत भएको दाबी गर्दै उच्च अदालतमा रिट दायर गरिएको थियो । अदालतले गत वर्ष नै पीसीएल नर्सिङ कार्यक्रम सञ्चालन गर्न कुनै कानुनी बाधा नहुने फैसला सुनाएको थियो । अदालतको उक्त फैसला कार्यान्वयनमा आउन ढिलाइ भएपछि आयोगका पूर्व सदस्य डा. पदम खड्काले सर्वोच्च अदालतअन्तर्गतको फैसला कार्यान्वयन निर्देशनालयमा गुहार मागेका थिए । निर्देशनालयको कडा निर्देशनपछि अन्ततः आयोग आफ्नो पूर्वनिर्णयबाट पछि हट्न बाध्य भएको हो ।
नयाँ परिस्थितिअनुसार अब १०० वा सोभन्दा बढी शय्या क्षमता भएका सबै शिक्षण अस्पताल तथा मेडिकल कलेजहरूले पीसीएल स्टाफ नर्ससँगै बीएन र बीएस्सी नर्सिङ कार्यक्रमहरू एकैसाथ सञ्चालन गर्न सक्नेछन् । यो परिवर्तनले नर्सिङ शिक्षा अध्ययन गर्न चाहने विद्यार्थीहरूका लागि थप अवसर सिर्जना गर्ने र देशमा दक्ष स्वास्थ्य जनशक्तिको अभावलाई कम गर्न मद्दत पुग्ने विश्वास लिइएको छ ।
