बर्दिया । नेपाल-भारत सीमा नाका नजिकैबाट प्रहरीले ठूलो परिमाणमा भन्सार छली गरी ल्याइएका गैरकानूनी मोबाइल फोनहरू बरामद गरेको छ ।
इलाका प्रहरी कार्यालय मैनापोखरको गस्ती टोलीले बढैयाताल गाउँपालिका–२ अन्तर्गत पर्ने फुटाहा चोकबाट ती सामग्रीहरू नियन्त्रणमा लिएको हो । साइकलमा ६ वटा बोरा राखेर आउँदै गरेका व्यक्तिहरूले सुरक्षाकर्मीलाई देख्नासाथ सामान छाडेर फरार भएपछि प्रहरीले उक्त बोराहरू खोतलेको थियो ।
सुरक्षा निकायका अनुसार बरामद गरिएका बोराहरूभित्र विभिन्न ब्रान्डका मोबाइल सेटहरू फेला परेका छन् । जसमा लाभा कम्पनीका ९७२ थान किप्याड मोबाइल रहेको र त्यसको बजार मूल्य झन्डै २२ लाख ६७ हजार २८ रुपैयाँ बराबर कायम गरिएको छ ।
नियन्त्रणमा लिइएका सम्पूर्ण मोबाइलहरूलाई आवश्यक कानूनी प्रक्रिया र कारबाहीका लागि गुलरियास्थित राजापुर भन्सार कार्यालयमा बुझाइएको छ । फरार रहेका व्यक्तिहरूको खोजी गर्नुका साथै घटनाबारे थप अनुसन्धान अघि बढाइएको प्रहरीले उल्लेख गरेको छ ।
