काठमाडौँ । नेपाल दूरसञ्चार प्राधिकरणको टेरामक्स खरिद प्रकरणमा जोडिएका पूर्वसञ्चारमन्त्री एवम् नेपाली कांग्रेसका नेता मोहनबहादुर बस्नेतले अदालतबाट उन्मुक्ति पाएका छन् ।
विशेष अदालतका न्यायाधीशहरू हेमन्त रावल, डिल्लीरत्न श्रेष्ठ र उमेश कोइरालाको संयुक्त इजलासले सोमबार बस्नेतलाई निर्दोष ठहर गर्दै सफाइ दिने निर्णय गरेको हो । नीतिगत निर्णय भइसकेपछिका कुनै पनि खरिद प्रक्रियामा पूर्वमन्त्री बस्नेतको संलग्नता नदेखिएको अदालतको निष्कर्ष छ । साथै, यो खरिद कार्यबाट उनले व्यक्तिगत रूपमा फाइदा लिएको भन्ने कुरा प्रमाणित गर्ने कुनै ठोस प्रमाण सरकारी पक्षले अदालतमा पेस गर्न नसकेको फैसलामा उल्लेख छ ।
यही प्रकरणमा तानिएका अन्य उच्च पदाधिकारीहरू भने अदालतबाट दोषी प्रमाणित भएका छन् । विशेष अदालतले प्राधिकरणका पूर्वअध्यक्ष दिगम्बर झा, पूर्वसञ्चार सचिव धनराज ज्ञवाली र टिकाप्रसाद उप्रेतीलाई भ्रष्टाचारी ठहर गरेको हो ।
कसुरदार ठहरिएका झा, ज्ञवाली र उप्रेती जनही छ महिना कैद सजाय भोग्नुपर्ने भएको छ भने उनीहरूलाई पचास हजार रुपैयाँ जरिवाना समेत तोकिएको छ ।
