काठमाडौँ । देशका विभिन्न ठाउँमा लगातार परेको वर्षासँगै आएको बाढी र पहिरोले कर्णालीसहित पाँचवटा प्रमुख राजमार्गको यातायात सेवा पूर्ण रूपमा ठप्प पारेको छ ।
कालिकोटको गगन खोलामा गए राति खसेको पहिरोका कारण कर्णाली राजमार्ग पूर्ण रूपमा अवरुद्ध हुन पुगेको हो । सडक डिभिजन कार्यालय जुम्लाका सूचना अधिकारी सौरभकुमार सिंहका अनुसार यतिबेला गगन खोलाको पहिरो पन्छाएर सडक सञ्चालनमा ल्याउने प्रयास निरन्तर भइरहेको छ । कार्यालयले वर्षात्को समयमा यात्रा गर्दा उच्च सावधानी अपनाउन र विशेषगरी रातिको समयमा यात्रा नगर्न सर्वसाधारणका नाममा सार्वजनिक सूचना जारी गरेको छ ।
यसैगरी, मेची राजमार्गअन्तर्गत इलाम नगरपालिका–९ राजदुपालीमा पहिरो जाँदा सडक खण्ड पूर्ण रूपमा बन्द भएको प्रहरीले जनाएको छ । यता बीपी राजमार्गको खुर्कोट–नेपालथोक–कटुन्जेबेँसी सडक खण्डमा भने भीषण वर्षाका कारण आउन सक्ने बाढीको सम्भावित जोखिमलाई मध्यनजर गर्दै प्रहरीले सवारी साधन सञ्चालनमा रोक लगाएको छ ।
पहिरोकै कारण मकवानपुरको भीमफेदी गाउँपालिका–५ भर्याडाँडामा कान्तिलोकपथ सडक खण्ड पनि पूर्ण रूपमा ठप्प बनेको छ । बागलुङको जैमिनी नगरपालिका–८ बेलबगरमा खसेको पहिरोले कालीगण्डकी करिडोरको यातायात सेवा पनि पूर्ण रूपमा रोकेको छ । यसैगरी, जुम्लाको तिला गाउँपालिका–३ त्रिवेणीदेखि तातोपानी गाउँपालिका–७ ताम्ती जोड्ने सडक खण्ड पनि पहिरोले अवरुद्ध पारेको छ । सडकको अवस्था बिग्रिएकाले यात्रामा निस्कनुअघि अनिवार्य रूपमा सम्बन्धित सडक खण्डको वस्तुस्थिति बुझ्न प्रहरीले सबैमा अनुरोध गरेको छ ।
