काठमाडौँ । नयाँ आर्थिक वर्षको बजेटलाई नतिजामुखी बनाउन र तोकिएकै समयमा आयोजनाहरू सम्पन्न गराउने लक्ष्यका साथ अर्थ मन्त्रालयले गृहकार्य तीव्र पारेको छ ।
सोमबार मन्त्रालयको सुवर्ण हलमा आयोजित विशेष बैठकमा अर्थमन्त्री डा. स्वर्णिम वाग्लेले बजेट कार्यान्वयनको प्रत्यक्ष जिम्मेवारी पाएका विभिन्न मन्त्रालयका सचिवहरूसँग गहन परामर्श गर्नुभएको हो ।
बैठकमा राष्ट्रिय योजना आयोगका उपाध्यक्ष डा. गुणाकर भट्ट र अर्थ सचिव डा. घनश्याम उपाध्यायका साथै पूर्वाधार, उद्योग, कृषि, स्वास्थ्य, शिक्षा, परराष्ट्र, पर्यटन, श्रम, गृह तथा रक्षा लगायतका प्रमुख मन्त्रालयका सचिव र प्रतिनिधिहरूको उपस्थिति रहेको थियो ।
छलफलका क्रममा चालु आर्थिक वर्षको बजेट समयमै प्रभावकारी ढङ्गले कार्यान्वयनमा ल्याउने, अन्तर-मन्त्रालय समन्वयलाई चुस्त बनाउने र विकास निर्माणका कामसँगै सेवा प्रवाहलाई अझ तीव्र गति दिने विषयमा विस्तृत सहमति भएको अर्थ मन्त्रालयले जनाएको छ ।
