काठमाडौँ । सङ्घीय संसद् अन्तर्गत प्रतिनिधिसभाका तीनवटा विषयगत समितिका बैठकहरू आज एकैदिन बस्दैछन् ।
संसद् सचिवालयका अनुसार सोमबार बिहानदेखि शिक्षा, स्वास्थ्य तथा सूचना प्रविधि समिति, सार्वजनिक लेखा समिति र अन्तर्राष्ट्रिय सम्बन्ध र पर्यटन समितिको बैठक बस्न लागेको हो ।
बिहान ९ बजे तय भएको शिक्षा, स्वास्थ्य तथा सूचना प्रविधि समितिको बैठकमा ‘राष्ट्रिय विधि विज्ञान प्रयोगशाला (स्थापना र सञ्चालन) विधेयक, २०८१’ माथि दफावार छलफल हुने कार्यसूची छ । उक्त छलफलका लागि विज्ञान, प्रविधि तथा नवप्रवर्तन मन्त्री र सचिवलाई समेत आमन्त्रण गरिएको छ ।
यस्तै, बिहान ९ बजे नै बस्ने सार्वजनिक लेखा समितिको बैठकले समितिको आन्तरिक कार्यविधि पारित गर्ने तयारी गरेको छ । सोही बैठकमा बेरुजु फर्स्योटका विषयमा छलफल गर्न एउटा उपसमिति गठन गर्ने प्रस्तावमाथि पनि छलफल हुनेछ ।
यसैगरी, बिहान साढे ९ बजेका लागि बोलाइएको अन्तर्राष्ट्रिय सम्बन्ध र पर्यटन समितिको बैठकमा परराष्ट्र मन्त्रीको हालै भएका भारत र चीन भ्रमणका विषयमा छलफल हुनेछ । बैठकमा परराष्ट्र मन्त्रीले आफ्ना वैदेशिक भ्रमण र अन्य समसामयिक कूटनीतिक मामिलाका बारेमा समितिलाई जानकारी गराउने कार्यसूची रहेको छ ।
