काठमाडौँ । मुगुका २५ वर्षीय गणेश नेपालीको मृत्यु भएपछि सरकार र पीडित पक्षबीच आन्दोलन टुङ्ग्याउन ९ बुँदे सहमति भएको छ ।
काठमाडौँका प्रमुख जिल्ला अधिकारी, महानगरका प्रमुख प्रशासकीय अधिकृत र मृतककी पत्नीबीच गृह मन्त्रालयमा भएको वार्तामा उक्त सम्झौता भएको हो ।
वार्तामा सहमति भएका ९ बुँदाहरू यस प्रकार छन्:
१. घटनाको निष्पक्ष छानविनका लागि सरकारले पूर्वन्यायाधीशको नेतृत्वमा तत्कालै स्वतन्त्र समिति बनाउने र सो समितिले सात दिनभित्र आफ्नो प्रतिवेदन बुझाउने ।
२. कानुनी प्रावधान, पुराना नजिर र छानविन समितिको सिफारिसका आधारमा मृतक नेपालीलाई सहिद घोषणा गर्ने प्रक्रिया अघि बढाउने ।
३. घटनाको समयमा अग्रभागमा खटिएका काठमाडौँ महानगरपालिकाका नगर प्रहरीहरूलाई छानविनको अन्तिम प्रतिवेदन नआउनेसम्मका लागि तत्काल निलम्बन गर्न जिल्ला प्रशासन कार्यालयले महानगरलाई पत्राचार गर्ने ।
४. महानगरपालिकाको आगामी कार्यपालिका बैठकबाट निर्णय गराएर मृतककी श्रीमतीलाई योग्यता अनुसारको जागिर दिने तथा छोरीको उच्च शिक्षासम्मको सम्पूर्ण पढाइ खर्च महानगरले ब्यहोर्ने ।
५. महानगरकै आगामी बैठकबाट निर्णय गरी आश्रित परिवारलाई राहत स्वरूप उचित रकम उपलब्ध गराउने ।
६. मृतकको अन्तिम संस्कार र काठमाडौँमा गरिने काजक्रियाको सबै बन्दोबस्त काठमाडौँ महानगरपालिकाले मिलाउने ।
७. पीडित परिवारले शव बुझेर पोष्टमार्टम लगायतका कानुनी प्रक्रिया पूरा गर्न सहयोग गर्ने र सद्गतको जिम्मा लिने ।
८. परिवारका सदस्यहरूको आउने-जाने गाडी भाडा र काठमाडौँमा बस्दा-खाँदा लाग्ने सम्पूर्ण खर्च महानगरपालिकाले बेहोर्ने ।
९. पीडित परिवारका सदस्यहरूको स्वास्थ्य बीमाको काम स्वास्थ्य तथा खाद्य स्वच्छता मन्त्रालयले व्यवस्थापन गर्ने ।
