काठमाडौँ । नेपाली चलचित्र क्षेत्रकी चर्चित अभिनेत्री एवं निर्देशिका दीपाश्री निरौलाको मस्तिष्कको ट्युमर (ब्रेन ट्युमर) को सफलतापूर्वक शल्यक्रिया गरिएको छ ।
स्वास्थ्यमा अचानक समस्या देखिएपछि केही दिनअघि काठमाडौँको माइतीघरस्थित अन्नपूर्ण न्युरो अस्पतालमा भर्ना भएकी उनको चिकित्सक टोलीले सफल शल्यक्रिया गरेको हो ।
अहिले उनी सोही अस्पतालमा उपचाररत छिन् । सुटिङका क्रममा रहेका बेला दीपाश्रीको स्वास्थ्यमा समस्या देखिएपछि परीक्षण गर्दा ब्रेन ट्युमर भएको पत्ता लागेको थियो । चिकित्सकहरूले तुरुन्तै शल्यक्रिया गर्नुपर्ने सुझाव दिएपछि उनलाई अस्पताल भर्ना गरिएको थियो । उनको शल्यक्रिया वरिष्ठ न्युरो सर्जन डा. वसन्त पन्तको नेतृत्वमा भएको हो ।
दीपाश्रीको सफल शल्यक्रियापछि उनका सहकार्यकर्ता एवं अभिनेता दीपकराज गिरीले सामाजिक सञ्जालमार्फत स्वास्थ्य अवस्थाबारे जानकारी गराएका छन् । गिरीका अनुसार सुरुमा उपचारका लागि भारत लैजाने सल्लाह भए पनि अन्तिममा नेपालकै अनुभवी डाक्टरबाट शल्यक्रिया गराउने निर्णय गरिएको थियो ।
शल्यक्रिया सफल भएपछि दीपाश्रीलाई आइसियूबाट जनरल वार्डमा सारेर आराम गराइँदै छ र उनको स्वास्थ्यमा क्रमिक सुधार भइरहेको छ ।
