काठमाडौँ । ओ एन्ड एम (संगठन तथा व्यवस्थापन) सर्वेक्षण सम्पन्न नभएसम्मका लागि लोक सेवा आयोगमार्फत हुने नयाँ स्थायी पदपूर्ति स्थगन गरिएको विषयमा प्रधानमन्त्री तथा मन्त्रिपरिषद्को कार्यालयले आफ्नो धारणा सार्वजनिक गरेको छ ।
सरकारले साविकका २२ वटा मन्त्रालयलाई घटाएर १८ वटामा झारेपछि नयाँ संगठन संरचना तथा कर्मचारी दरबन्दी समायोजनको काम भइरहेको छ । मन्त्रालय र मातहतका निकायहरूको दरबन्दी व्यवस्थापनका लागि भइरहेको सर्वेक्षण अहिले अन्तिम चरणमा पुगेको छ । यो प्रक्रिया पूरा हुँदा केही पदको दरबन्दी घट्न सक्ने र हाल कार्यरत केही कर्मचारी फाजिल (अतिरिक्त) हुने सम्भावना रहेकाले तत्कालका लागि स्वीकृतिबिना नयाँ माग नपठाउने निर्णय सचिव बैठकले गरेको हो ।
कार्यालयका अनुसार फाजिलमा परेका कर्मचारीको उचित व्यवस्थापन भइसकेपछि वा नयाँ स्वीकृत दरबन्दी कायम भएपछि लोक सेवा आयोगमार्फत नियमित रूपमा नयाँ पदपूर्तिको प्रक्रिया अघि बढाइनेछ ।
कर्मचारी प्रशासनलाई चुस्त र व्यवस्थित बनाउन यो अस्थायी कदम चालिएकाले O&M सर्वेक्षण सकिनासाथ आवश्यक जनशक्ति पूर्ति प्रक्रिया सुचारु हुने जानकारी गराइएको छ ।
