काठमाडौँ । नेकपा (एमाले) का अध्यक्ष केपी शर्मा ओलीले संसदमा कानुन निर्माणका लागि आफ्नो दलको संख्या कम भए पनि रचनात्मक बहस र संशोधनका माध्यमबाट उत्कृष्ट कानुन कस्तो हुनुपर्छ भन्ने कुरा पुष्टि गर्नुपर्ने धारणा राख्नुभएको छ ।
एमाले संसदीय दलद्वारा आयोजित अन्तरक्रिया कार्यक्रमलाई सम्बोधन गर्दै उहाँले सो कुरा बताउनुभएको हो ।
उहाँले सांसदहरूलाई पार्टीले तय गरेका योजना, नीति र सिद्धान्तका आधारमा संसद्मा प्रस्तुत हुन आग्रह गर्नुभयो । संसद्मा आफ्नो दलको सानो उपस्थिति भए पनि दृढतापूर्वक विचार राख्दा त्यसले ठूलो शक्तिको रूप लिने उहाँको भनाइ थियो । यसका साथै संसद्मा विषयवस्तु प्रस्तुत गर्दा पार्टीका सम्बन्धित विभागहरूसँग आवश्यक समन्वय गरी संगठित रूपमा काम गर्न उहाँले निर्देशन दिनुभयो ।
मुलुकको विद्यमान परिस्थितिको चर्चा गर्दै अध्यक्ष ओलीले नेपाली युवाहरू वैदेशिक रोजगारीमा जाने क्रम अझै नरोकिएकोमा चिन्ता व्यक्त गर्नुभयो । गत वर्ष मुलुक नै खाली हुन लाग्यो भनेर नकारात्मक प्रचार गरिएको स्मरण गर्दै उहाँले अहिले भने विदेश जानुलाई अधिकारका रूपमा व्याख्या गर्न खोजिएको टिप्पणी गर्नुभयो ।
यस्तै, मिटरब्याज पीडितहरूले सरकारबाट फेरि पनि धोका पाएको दाबी गर्दै उहाँले यो वास्तविकता पीडितहरूले केही समयपछि आफैँ बुझ्ने उल्लेख गर्नुभयो ।
