काठमाडौँ । नेपाल र संयुक्त अरब इमिरेट्स (यूएई) बीचको आपसी सहकार्य र द्विपक्षीय सम्बन्धलाई थप बलियो बनाउने विषयमा उच्चस्तरीय छलफल भएको छ ।
प्रतिनिधिसभाका सभामुख डोलप्रसाद (डीपी) अर्याल र नेपाल भ्रमणमा रहेका यूएईका विदेश व्यापारमन्त्री डा. थानी बिन अहमद अल जेयोउदीबीच शुक्रबार सिंहदरबारमा शिष्टाचार भेटवार्ता भएको हो । वर्तमान संसद् गठन भएपछि यूएईबाट भएको यो नै सबैभन्दा उच्च तहको भ्रमण हो ।
भेटका क्रममा सभामुख अर्यालले सन् १९७७ मा सुरु भएको दुई देशबीचको कूटनीतिक सम्बन्ध मित्रता र आपसी विश्वासमा टिकेको चर्चा गरे । आगामी सन् २०२७ मा कूटनीतिक सम्बन्ध स्थापनाको ५० वर्ष पुग्ने अवसरमा स्वर्ण जयन्तीलाई उपलब्धिमूलक ढंगले मनाउन नेपाल उत्सुक रहेको उनले बताए । नेपालको प्रतिनिधिसभाले भर्खरै यूएईसँग संसदीय मैत्री समूह गठन गरेको जानकारी दिँदै उनले यूएईको संघीय राष्ट्रिय परिषद्ले पनि यस्तै समूह बनाए दुई देशका संसद्बीच अनुभव र अभ्यास साटासाट गर्न सजिलो हुने धारणा राखे । राष्ट्रसंघ, असंलग्न आन्दोलन र अबुधाबी संवाद जस्ता अन्तर्राष्ट्रिय मञ्चहरूमा दुई देशबीचको सहकार्य जारी रहनेमा उनले जोड दिए ।
सभामुख अर्यालले आगामी असोज ७ गतेदेखि फ्लाई दुबईले पोखरा–दुबई सिधा दैनिक उडान सुरु गर्न लागेकोमा खुसी जनाउँदै यूएईका पर्यटकलाई नेपाल पठाउन आग्रह गरे । नेपाल सरकारले भैरहवा र पोखरा अन्तर्राष्ट्रिय विमानस्थलमा यूएईका विमान कम्पनीहरूलाई ‘पाँचौँ स्वतन्त्र उडान अधिकार’ सहितका सहुलियत दिने निर्णय गरेको जानकारी समेत उनले गराए ।
जवाफमा यूएईका विदेश व्यापारमन्त्री अल जेयोउदीले नेपालमा नयाँ सरकार बनेपछिको आफ्नो यो पहिलो भ्रमणले दुई देशको सम्बन्धलाई अझ मजबुत बनाउने विश्वास दिलाए । यूएई नेपालमा लगानी अनुकूल वातावरण बनाउन सकारात्मक रहेको भन्दै उनले प्रविधि, पूर्वाधार र शिक्षा क्षेत्रमा लगानी बढाउन आफ्नो देश इच्छुक रहेको स्पष्ट पारे । यूएईको विकासमा नेपाली श्रमिकहरूले पुर्याएको योगदानको प्रशंसा गर्दै उनले आगामी दिनमा सहकार्यलाई अझै विस्तार गर्ने प्रतिबद्धता जनाए । मन्त्री अल जेयोउदी १८ सदस्यीय प्रतिनिधिमण्डलको नेतृत्व गर्दै नेपाल आएका हुन् ।
