सिन्धुली । बीपी राजमार्ग अन्तर्गत सिन्धुलीको गोलन्जोर गाउँपालिका–५ छब्बिसमा आज एक यात्रुवाहक हाइस दुर्घटनामा परेको छ ।
मोरङबाट काठमाडौँतर्फ आउँदै गरेको बा ५ ख ५९८४ नम्बरको हाइसको ब्रेक अचानक फेल भएर अनियन्त्रित भई सडकको नालामा खसेको हो । सवारी साधनमा चालकसहित १४ जना यात्रु सवार रहेकोमा दुर्घटनाबाट चार जना घाइते भएका छन् ।
दुर्घटनामा परेर धनुषाको गणेशमान नगरपालिका–७ की २२ वर्षीया रुवी साह तथा मोरङको सुन्दरहरैँचा नगरपालिका–१२ का १९ वर्षीय समित भुजेल गम्भीर घाइते भएका छन् । यसैगरी मोरङकै सुन्दरहरैँचा नगरपालिका–१२ का २० वर्षीय उज्वल चौधरी र सुनसरीको इटहरी उपमहानगरपालिका–१७ का ४२ वर्षीय दुर्गानन्द शर्मालाई सामान्य चोटपटक लागेको छ । घाइते सबैलाई तत्कालै उपचारका लागि जिल्ला अस्पताल सिन्धुली लगिएको छ ।
घटनापछि मोरङको बेलबारी नगरपालिका–३ निवासी २५ वर्षीय हाइस चालक उमेश श्रेष्ठलाई नियन्त्रणमा लिएर प्रहरीले घटनाबारे आवश्यक थप अनुसन्धान अगाडि बढाएको छ । दुर्घटनाग्रस्त हाइस भने अहिले पनि घटनास्थलमै रहेको प्रहरीले जानकारी दिएको छ ।
