हेटौँडा । विगत लामो समयदेखि थप्प बनेको हेटौँडा कपडा उद्योगलाई फेरि नयाँ जीवन दिन सरकारले अर्थ मन्त्रालयसँग थप बजेट नमागी आफ्नै आन्तरिक स्रोत जुटाएर सञ्चालन गर्ने योजना बनाएको छ ।
उद्योग, वाणिज्य तथा आपूर्ति मन्त्री गौरीकुमारी यादवले औद्योगिक क्षेत्र व्यवस्थापनबाट लामो समयदेखि उठ्न बाँकी रहेको करिब आधा अर्ब रुपैयाँ भाडा बक्यौता असुल गरी सोही रकम कपडा उद्योगको स्तरोन्नति र निरन्तर उत्पादनमा प्रयोग गरिने जानकारी दिनुभयो ।
हेटौँडामा परीक्षणका रूपमा चलिरहेको उद्योगको स्थलगत निरीक्षण गर्दै मन्त्री यादवले अब यसलाई परीक्षणमै सीमित नराखी दीर्घकालीन रूपमा नियमित उत्पादनतर्फ लैजानुपर्नेमा जोड दिनुभयो ।
हाल उद्योगमा १० वटा लुमबाट कपडा उत्पादन भइरहेको छ भने थप १० वटा मेसिन चाँडै सञ्चालनमा ल्याउने तयारी छ । नेपाली सेनाको प्राविधिक टोलीले बाँकी मेसिन तथा उपकरणको अवस्था जाँचेर सञ्चालनयोग्य बनाउने काम गरिरहेको छ ।
सरकारले उच्च प्राथमिकतामा राखेको यो परियोजनालाई सफल बनाउन नेपाली सेनाको निरन्तर सहयोग आवश्यक रहने भन्दै मन्त्री यादवले तोकिएको समयमै उद्योग सञ्चालनमा ल्याउन योगदान पुर्याएकोमा सेनालाई धन्यवाद दिनुभयो ।
नेपालको सबैभन्दा ठूलो यस टेक्सटाइल उद्योगका सबै मेसिन सञ्चालनमा आउन सके कपडा उत्पादनमा मुलुकलाई ठूलो राहत पुग्ने अपेक्षा गरिएको छ ।
