पोखरा । पर्यटकीय नगरी पोखराको वडा नम्बर २२ स्थित कोदीमा दोस्रो कोदो महोत्सव भव्य रूपमा आयोजना गरिएको छ ।
पोखरा महानगरपालिकाका प्रमुख धनराज आचार्यले उद्घाटन गर्नुभएको उक्त कार्यक्रममा मौलिक एवम् रैथाने बालीका रूपमा रहेको कोदोको संरक्षण र विस्तारमा जोड दिइएको थियो ।
समारोहलाई सम्बोधन गर्दै नगरप्रमुख आचार्यले रैथाने बालीको प्रवर्द्धन र कृषकहरूलाई प्रोत्साहन गर्न महानगरपालिका निरन्तर प्रतिबद्ध रहेको स्पष्ट पार्नुभयो । कोदोको उत्पादन वृद्धि, उचित बजारीकरण र मूल्य अभिवृद्धिमार्फत किसानको जीवनस्तर सुधार्न विभिन्न नीति तथा कार्यक्रम ल्याइएको उहाँको भनाइ थियो । खाद्य सुरक्षा र आत्मनिर्भर कृषिमा ध्यान दिनुपर्ने औंल्याउँदै उहाँले कार्यक्रमका बीच किसानहरूलाई कोदोको न्यूनतम समर्थन मूल्यसमेत हस्तान्तरण गर्नुभयो ।
उत्पादनका आधारमा उत्कृष्ट ठहरिएका चार जना कृषकलाई सो अवसरमा नगद र सम्मानपत्रद्वारा पुरस्कृत गरियो । सम्मानित हुनेहरूमा १७ रोपनीमा कोदो खेती गर्ने पोखरा–२२ का खगी घर्ती, ११ रोपनीमा खेती गर्ने पोखरा–२० का दुर्गा बहादुर सुनार, १० रोपनीमा खेती गर्ने पोखरा–२८ का शोभा भण्डारी र ९ रोपनीमा खेती गर्ने पोखरा–२३ का होम बहादुर गुरुङ रहनुभएको छ ।
महोत्सवका क्रममा कोदो रोप्ने रोचक प्रतियोगितासमेत गराइएको थियो । महानगरको आर्थिक विकास महाशाखा प्रमुख मनहर कडरियाका अनुसार पोखरा नगर क्षेत्रको करिब ३ हजार ८ सय हेक्टरमा कोदो खेती गरिँदै आएको छ र यस वर्ष करिब ४८ सय मेट्रिक टन उत्पादन हुने अनुमान छ । बजारमा माग बढे पनि उत्पादन घट्दो क्रममा रहेकाले किसानलाई आकर्षित गर्न न्यूनतम समर्थन मूल्य दिने नीति लिइएको कडरियाले जानकारी दिनुभयो ।
महोत्सवस्थलमा कोदोबाट निर्मित विविध स्थानीय परिकारका साथै कृषि उद्यमसँग सम्बन्धित सामग्रीहरूको प्रदर्शनी राखिएको थियो । उक्त कार्यक्रममा स्थानीय कृषक, कृषि उद्यमी, सहकारी प्रतिनिधि तथा सर्वसाधारणको उल्लेख्य उपस्थिति रहेको थियो ।
