काठमाडौँ । संघीय संसद भवन नयाँ बानेश्वरमा आज दिउँसो १ बजे प्रतिनिधि सभाको बैठक आह्वान गरिएको छ ।
संसद सचिवालयले तय गरेको सम्भावित कार्यसूची अनुसार आजको बैठकमा विशेषगरी संवैधानिक आयोगको प्रतिवेदन र भूमिहीन सुकुम्बासीको समस्या समाधानसँग सम्बन्धित विषयमा छलफल हुनेछ ।
बैठकमा प्रधानमन्त्री वालेन्द्र शाहका तर्फबाट कानुन, न्याय तथा संसदीय मामिला मन्त्री सोबिता गौतमले ‘आदिवासी जनजाति आयोगको छैटौं वार्षिक प्रतिवेदन (आ.व. २०८१/०८२)’ पेस गर्ने कार्यक्रम रहेको छ ।
यसैगरी, सांसद भिष्मराज आङ्देम्बेले वास्तविक भूमिहीन, सुकुम्बासी तथा अव्यवस्थित बसोबासीको पहिचान गरी उनीहरूको सुरक्षित आवास, खाद्य, स्वास्थ्य, शिक्षा र जीविकोपार्जनको ग्यारेन्टी गर्न सरकारको ध्यानाकर्षण गराउँदै जरुरी सार्वजनिक महत्वको प्रस्ताव प्रस्तुत गर्नुहुनेछ । उक्त प्रस्तावमा नागरिकको स्थायी पुनःस्थापना र यथाशीघ्र लालपुर्जा वितरणको माग गरिएको छ । यो प्रस्तावलाई सांसदहरू ऐन बहादुर महर, युवराज दुलाल र आरेन राईले समर्थन गर्ने कार्यसूची रहेको छ ।
