काठमाडौँ । लगातारको झरीपछि आएको बाढी, पहिरो तथा खोलाले सडक कटान गर्दा देशका धेरैजसो मुख्य राजमार्गहरूमा यातायात सेवा ठप्प भएको छ ।
प्रहरीको पछिल्लो तथ्याङ्क अनुसार बुधबार बिहानसम्म विभिन्न जिल्लाका प्रमुख सडक खण्डहरूमा सवारी आवागमन पूर्ण रूपमा बन्द रहेको छ ।
काभ्रेपलाञ्चोक र सिन्धुली जोड्ने बिपी राजमार्ग अन्तर्गत खुर्कोट–नेपालथोक–कटुन्जेबेँसी खण्डमा बाढीको जोखिमलाई ध्यानमा राख्दै रात्रिकालीन आवागमनमा रोक लगाइएको छ । अर्को सूचना जारी नभएसम्मका लागि बेलुका ६ बजेदेखि बिहान ४ बजेसम्म सवारी सञ्चालन गर्न पाइने छैन । यद्यपि बिहान ४ बजेदेखि बेलुका ६ बजेसम्म भने सडक खुला रहनेछ ।
यसैगरी मकवानपुरको कान्ति लोकपथमा पनि वर्षाका कारण बेलुका ५ बजेदेखि बिहान ५ बजेसम्म सबै प्रकारका सवारी साधन सञ्चालनमा प्रतिबन्ध लगाइएको छ ।
पूर्वी नेपालको इलाम स्थित मेची राजमार्ग अन्तर्गत इलाम नगरपालिका–९ राजदुवाली खण्ड अत्यधिक हिलो भएका कारण यातायात सञ्चालन हुन सकेको छैन । प्रहरीका अनुसार सो स्थानमा यात्राका लागि वैकल्पिक मार्ग उपलब्ध छ ।
सिन्धुपाल्चोकको अरनिको राजमार्गमा पहिरो र सडक भासिएका कारण समस्या थप जटिल बनेको छ । भोटेकोशी गाउँपालिका–४ चारकिलो, भोटेकोशी–२ कोदारीस्थित इँकु क्षेत्र र लिपिङमा सडक भासिएपछि उक्त राजमार्गका विभिन्न खण्ड पूर्ण रूपमा बन्द छन् ।
यता रसुवाको उत्तरगया गाउँपालिका–५ खाल्टेमा त्रिशूली नदीले सडक कटान गर्दा त्रिशूली–मैलुङ–स्याफ्रुबेंसी कच्ची सडक साउन ८ गतेदेखि नै ठप्प छ । साथै रुकुम पश्चिमको भेरी करिडोर अन्तर्गत जाजरकोट–डोल्पा सडक खण्डको रिजेगार्ड खोला क्षेत्रमा लेदोसहितको पहिरो खसेपछि सवारी साधन चल्न सकेका छैनन् ।
