पोखरा । लगातारको भारी वर्षापछि मोदी खोलामा आएको बाढीले अन्नपूर्ण गाउँपालिका तथा आसपासका क्षेत्रका भौतिक पूर्वाधार, सडक र विद्युत् सेवामा ठूलो क्षति पुर्याएको छ ।
कास्की र पर्वतको सीमा भएर बग्ने उक्त खोलामा आएको बाढीले नयाँपुल–वीरेठाँटी–घान्द्रुक सडकखण्डअन्तर्गत वीरेठाँटी नजिकैको मुख्य सडक कटान गरेको छ । सडकको बेस नै बगाएपछि त्यस क्षेत्रमा यातायात आवगमन पूर्ण रूपमा ठप्प बनेको छ भने आसपासका बस्तीहरू जोखिममा परेका छन् ।
यसैबीच, अन्नपूर्ण गाउँपालिका–६ हाईजुङस्थित माता अन्नपूर्ण मन्दिरमा बाढीका कारण थुनिएका तीन जनाको सकुशल उद्धार गरिएको छ । खोलाको बीचमा रहेको मन्दिरमा बाढी पसेपछि पुजारीसहित तीन जना जोखिममा परेका थिए ।
बाढीले पातीचौर क्षेत्रमा ३३ केभी प्रसारण लाइनको पोल बगाएपछि मोदी विद्युत् उपकेन्द्रबाट कुश्मा जाने विद्युत् आपूर्ति अवरुद्ध बनेको थियो । हाल दाना विद्युत् उपकेन्द्रबाट वैकल्पिक लाइनमार्फत कुश्मा क्षेत्रमा विद्युत् आपूर्ति पुनः सञ्चालन गरिएको छ ।
