ललितपुर । महालक्ष्मी नगरपालिका वडा नं १ स्थित किष्ट अस्पताल नजिकै रहेको विद्युतीय पोलको तारमा आज अचानक आगलागी भएको छ ।
पोलमा अव्यवस्थित रूपमा जेलिएका विद्युत्, टेलिफोन तथा विभिन्न इन्टरनेट सेवा प्रदायकका तारहरूमा आगो सल्किँदा सो क्षेत्रमा केही बेर त्रास फैलिएको थियो ।
आगलागी लगत्तै खटिएका दमकलकर्मी, स्थानीय बासिन्दा र प्रहरीको संयुक्त प्रयासमा आगो पूर्ण रूपमा नियन्त्रणमा लिइएको छ । समयमै आगो नियन्त्रणमा आएकाले नजिकै रहेका घर, पसल तथा अस्पताल क्षेत्रमा थप क्षति हुन पाएको छैन ।
विद्युत् सर्ट भएर आगलागी भएको प्रारम्भिक अनुमान गरिएको छ ।
फोटो: टेरेन्स महतो
