जनकपुरधाम । जिल्ला प्रशासन कार्यालय सप्तरीले राजबिराज तथा बोदेबरसाइन क्षेत्रमा लागू गरिएको कर्फ्यु हटाउने निर्णय गरेको छ ।
प्रमुख जिल्ला अधिकारी श्यामकृष्ण थापाका अनुसार आइतबार आयोजना गरिएको जिल्ला सुरक्षा समितिको बैठकले कर्फ्यु हटाउने निष्कर्ष निकालेको हो । कर्फ्यु हटाइए पनि प्रशासनले मानिसहरूको आवतजावत र भेलालाई नियन्त्रण गर्न ती क्षेत्रहरूमा निषेधाज्ञा भने जारी राखेको छ । नयाँ व्यवस्थाअनुसार अब ५ जनाभन्दा बढी व्यक्ति एकै ठाउँमा जम्मा हुन, कुनै पनि किसिमको सभा, जुलुस, धर्ना वा प्रदर्शन गर्न पाइने छैन ।
प्रशासनले राजबिराज नगरपालिका अन्तर्गत पूर्वमा खाडो खोला, पश्चिममा हुलाकी राजमार्गको जमुनी थलही, उत्तरमा रुपनी रोडको बसविट्टी र दक्षिणमा विष्णुपुर गाउँपालिकातर्फ पर्ने कोसी पश्चिम मूल नहरसम्मको सीमाभित्र निषेधाज्ञा लागू गरेको छ ।
यसै गरी, बोदेबरसाइन नगरपालिकाको पूर्वतर्फ हुलाकी राजमार्गको खडक पुल, पश्चिममा प्रितमपुर चोक, उत्तरमा नेगडा चोक तथा दक्षिणमा मानराजा चोकसम्मको क्षेत्रलाई निषेधित क्षेत्र तोकिएको छ ।
