काठमाडौँ । सरकारले वर्षायाममा बढी भएर खेर गइरहेको बिजुलीको उपयोग बढाउन विद्युत महसुल घटाउने तयारी थालेको छ ।
ऊर्जा, जलस्रोत तथा सिँचाइ मन्त्री विराजभक्त श्रेष्ठको प्रस्तावमा प्राधिकरणले गत साउन १३ गते विद्युत् महसुल दर पुनरावलोकन समिति गठन गरेको थियो । सोही समितिले अहिले उपभोक्ता तथा उद्योगहरूलाई लक्षित गरी सहुलियत दरमा विद्युत उपलब्ध गराउन आवश्यक गृहकार्य अगाडि बढाएको हो ।
नेपाल विद्युत प्राधिकरण सञ्चालक समितिका सदस्य अंशुकिरण शाहीको संयोजकत्वमा गठित उक्त समितिमा ऊर्जा मन्त्रालय, नेपाल उद्योग वाणिज्य महासंघ, ऊर्जा विज्ञ, उपभोक्ता अधिकारकर्मी तथा वित्त विज्ञहरू समेटिएका छन् ।
बर्खामा बिजुली खेर जाँदा प्राधिकरणले ठूलो वित्तीय घाटा व्यहोर्नु परेकाले आन्तरिक खपत बढाउन ‘सिजनल ट्यारिफ’ ल्याउन लागिएको संयोजक शाहीले जानकारी दिएका छन् । उद्योगहरूलाई बर्खायामको बिजुली सस्तो मूल्यमा उपलब्ध गराउँदा उनीहरूले उत्पादन गर्ने वस्तुको मूल्यसमेत घटाएर सर्वसाधारणलाई राहत दिन सकिने विषयमा पनि छलफल भइरहेको छ ।
महसुल घटाउने र सहुलियत तय गर्ने सम्बन्धमा आज मन्त्रालयमा निर्णायक बैठक बस्दैछ ।
